PAPANIMULA/ KALIGIRAN

Walang nilalang ang Diyos na perpekto; lahat tayo ay nagkakamali. Kaakibat ng bawat pagkakamaling nagagawa natin ay ang mga bagay na ating natututunan mula dito. Oo, hindi masamang magkamali- pagkakamali sa mga desisyon, at maging sa mga simpleng bagay sa  paligid natin katulad na lamang ng pagbabaybay ng mga salita. Ngunit kung ating sisiyasatin sa mas malalim na punto, bakit nga ba may mga Pilipinong salat sa kaalaman sa tamang pagbaybay ng mga ordinaryong salita?

Ang tanging nagbigay-daan sa amin upang isagawa ang adbokasiyang ito ay ang ating mga kababayan na patuloy na nakikipagsapalaran sa hamon ng buhay kahit hindi gaanong nakatamasa ng isang pormal na edukasyon. Ilan sa mga imaheng pagkakamali na aming tinutukoy ay ang isang babaeng tubong Baguio City na nagtitinda ng “strawberry” ngunit ang baybay nito sa paskil ay “stroberry”. Isa pa nito ay ang imahe ng pampasadang  dyip na may karatulang Blumentritt-Novalechis na dapat ay “Novaliches”.

Huwag lang sana nating isiping bunga lang ang maling pagbaybay sa limitadong pormal na edukasyon. Totoo namang repleksiyon ito ng mababang pinag-aralan pero higit pa rito ang isyu. Dahil sa kanilang kinasasadlakan, hindi hamak na mas mahalaga ang kumita para sa pamilya kaysa muling matutuhan ang balarila’t ortograpiya. Ang kanilang araw-araw na pakikibaka sa mga hamon ng buhay ay may praktikal na layuning makapag-ipon ng pambili ng bigas at murang ulam tulad ng tuyo at sardinas.